‘വർഗീയ രാഘവൻ’; വടക്കേ ഇന്ത്യയിലെ ബിജെപി രാഷ്ട്രീയമാണ് കേരളത്തിൽ സിപിഎം നടപ്പാക്കുന്നതെന്ന് വിമർശനം

രാഹുൽ ഗാന്ധിയുടെയും പ്രിയങ്ക ഗാന്ധിയുടെയും വയനാട്ടിലെ വിജയം വർഗീയ ശക്തികളുടെ പിന്തുണയോടെ ആണെന്ന സിപിഎം പോളിറ്റ് ബ്യൂറോ അംഗം എ. വിജയരാഘവന്റെ പ്രസ്താവനക്കെതിരെ യുഡിഎഫ്. പ്രതിപക്ഷ നേതാവ് വിഡി സതീശൻ, കോൺഗ്രസ് നേതാവ് കെസി വേണുഗോപാൽ, മുസ്ലിം ലീഗ് നേതാക്കളായ പികെ കുഞ്ഞാലിക്കുട്ടിയും കെഎം ഷാജി എംഎല്‍എയുമടക്കമുള്ള മുന്നണി നേതാക്കള്‍ അതിരൂക്ഷമായ വിമർശനമാണ് പ്രസ്താവനക്കെതിരെ നടത്തിയിരിക്കുന്നത്. വായ തുറന്നാൽ വർഗീയത മാത്രം പറയുന്ന വിജയരാഘവൻ വർഗീയ രാഘവനായി മാറിയെന്നായിരുന്നു കെഎം ഷാജിയുടെ പ്രതികരണം. ആർഎസ്എസ് പോലും പറയാന്‍ മടിക്കുന്നതാണ് വിജയരാഘവന്‍ പറയുന്നതെന്നും അദ്ദേഹം കുറ്റപ്പെടുത്തി.

ന്യൂനപക്ഷത്തിന്റെ പേര് പറയുന്ന വര്‍ഗീയവാദികളാണ് ഇരുനേതാക്കളെയും വിജയിപ്പിച്ചതെന്നും അതിനാല്‍ സൂക്ഷിക്കണമെന്നാണ് വിജയരാഘവന്‍ പറഞ്ഞത്. എന്ത് തെമ്മാടിത്തരമാണ് ഇത്. സിപിഎമ്മിന് മുസ്ലിം ലീഗാണ് പ്രശ്‌നമെന്നും കെ.എം. ഷാജി പറഞ്ഞു. വിജയരാഘവന്‍ കളിക്കുന്നത് വൃത്തികെട്ട രാഷ്ട്രീയമാണെന്നും തങ്ങളുടെ കൊക്കിന് ജീവനുണ്ടെങ്കില്‍ അതിന് മറുപടി നല്‍കുമെന്നും അദ്ദേഹം കൂട്ടിച്ചേര്‍ത്തു. വിജയരാഘവന്‍ വര്‍ഗീയ രാഘവനായി മാറിയെന്ന് കോണ്‍ഗ്രസ്‌ നേതാവ് കെസി വേണുഗോപാലും ആരോപിച്ചു.

വിഷയത്തില്‍ സി പി എം പോളിറ്റ് ബ്യൂറോ നിലപാട് വ്യക്തമാക്കണം. ബിജെപിയുടെ ക്വട്ടേഷന്‍ സിപിഎം ഏറ്റെടുത്തു. എന്നാല്‍ അണികള്‍ ഏറ്റെടുക്കില്ലെന്നും വേണുഗോപാല്‍ പറഞ്ഞു. സംഘപരിവാറിനെ പോലും നാണിപ്പിക്കുന്ന വര്‍ഗീയ സമീപനമാണ് സിപി മ്മിനുള്ളതെന്ന് പ്രതിപക്ഷ നേതാവ് വിഡി സതീശന്‍ കുറ്റപ്പെടുത്തി. ആര്‍എസ് എസിന് ഉപയോഗിക്കാനുള്ള ആയുധമാണ് വിജയരാഘവന്റെ പ്രസ്താവനയെന്നും സതീശന്‍ പറഞ്ഞു.

സിപിഎം ഭൂരിപക്ഷ വർഗീയത ഇളക്കിവിടുകയാണ് എന്നായിരുന്നു കുഞ്ഞാലിക്കുട്ടിയുടെ പ്രതികരണം. ക്രൂരമായ പരാമർശമാണ് വിജയരാഘവൻ നടത്തിയത്. ഉത്തരേന്ത്യയിൽ ബിജെപി കൊണ്ടുനടക്കുന്ന രാഷ്ട്രീയമാണ് കേരളത്തിൽ സിപിഎം പരീക്ഷിക്കുന്നതെന്നും അദ്ദേഹം കുറ്റപ്പെടുത്തി. വോട്ടു ചോരുമെന്ന ആധിയാണ് സിപിഎം നേതാക്കളെ ഇങ്ങനെ പച്ചക്ക് വർഗീയത പറയാൻ പ്രേരിപ്പിക്കുന്നത്. ഇത് കേരളമാണെന്നും ലീഗ് നേതാവ് ഓർമപ്പെടുത്തി. വർഗീയത പറഞ്ഞാൽ കേരളത്തിൽ വിപരീത ഫലമാണ് ഉണ്ടാവുക. വയനാട്ടിലെ വോട്ടർമാരെ മൊത്തം തള്ളിപ്പറയുന്ന രീതിയാണ് വിജയരാഘവന്റെതെന്നും കുഞ്ഞാലിക്കുട്ടി ആരോപിച്ചു.

വ​യ​നാ​ട് ലോ​ക്സ​ഭ മ​ണ്ഡ​ല​ത്തി​ൽ​ നി​ന്ന് വി​ജ​യി​ച്ച് രാ​ഹു​ൽ ഗാ​ന്ധിയും പ്രിയങ്ക ഗാന്ധിയും
പാർലമെൻ്റിൽ എ​ത്തി​യ​ത് മുസ്ലിം വ​ർ​ഗീ​യ ചേ​രി​യു​ടെ ദൃ​ഢ​മാ​യ പി​ന്തു​ണ​യോ​ടെ​യാ​ണ് എന്നായിരുന്നു വി​ജ​യ​രാ​ഘ​വ​ൻ്റെ വിവാദ പരാമർശം. അ​വ​രു​ടെ പി​ന്തു​ണ ഇ​ല്ലെ​ങ്കി​ൽ രാ​ഹു​ൽ ഗാ​ന്ധി ജ​യി​ക്കു​മാ​യി​രു​ന്നി​ല്ല. പ്രി​യ​ങ്ക ഗാ​ന്ധി​യു​ടെ ഓ​രോ ഘോ​ഷ​യാ​ത്ര​യു​ടെ മുന്നി​ലും പി​ന്നി​ലും ന്യൂ​ന​പ​ക്ഷ വ​ർ​ഗീ​യ​ത​യി​ലെ ഏ​റ്റ​വും മോ​ശ​പ്പെ​ട്ട വ​ർ​ഗീ​യ, തീ​വ്ര​വാദ ഘ​ട​ക​ങ്ങ​ൾ ആ​യി​രു​ന്നു​വെ​ന്നും വി​ജ​യ​രാ​ഘ​വ​ൻ പറഞ്ഞിരുന്നു. സിപിഎം വയനാട് ജി​ല്ല സ​മ്മേ​ള​ന​ത്തി​ന്‍റെ പ്ര​തി​നി​ധി സ​മ്മേ​ള​നം ഉ​ദ്ഘാ​ട​നം ചെയ്യവെയായിരുന്നു പ്രസ്താവന.