പ്രധാനമന്ത്രി ഇന്ന് തലസ്ഥാനത്ത്; ഗഗന്‍യാന്‍ സഞ്ചാരികളുടെ പേര് വെളിപ്പെടുത്തിയേക്കും

തിരുവനന്തപുരം: പ്രധാനമന്ത്രി നരേന്ദ്രമോദി ഇന്ന് തിരുവനന്തപുരത്തെത്തും. വിഎസ്എസ്സിയില്‍ നടക്കുന്ന ചടങ്ങിലും ബിജെപി സംസ്ഥാന അധ്യക്ഷന്‍ കെ.സുരേന്ദ്രന്‍ നയിക്കുന്ന കേരള പദയാത്രയുടെ സമാപനത്തിലും അദ്ദേഹം പങ്കെടുക്കും.

രാവിലെ 10.30-ന് അന്താരാഷ്ട്ര വിമാനത്താവളത്തിലെത്തുന്ന പ്രധാനമന്ത്രി നേരെ വിക്രം സാരാഭായ് സ്പേസ് സെന്ററിലേക്ക് പോകും. വിവിധ പദ്ധതികളുടെ ഉദ്ഘാടനം നിര്‍വഹിക്കും. ഗഗന്‍യാനിന്റെ തയ്യാറെടുപ്പുകള്‍ വിലയിരുത്തും. ഇന്ത്യ ബഹിരാകാശത്തേക്ക് അയക്കുന്ന സഞ്ചാരികളുടെ പേര് പ്രധാനമന്ത്രി ഇന്ന് വെളിപ്പെടുത്തിയേക്കും.

സെന്‍ട്രല്‍ സ്റ്റേഡിയത്തില്‍ രാവിലെ 10-ന് ആരംഭിക്കുന്ന കേരള പദയാത്രാ സമാപനച്ചടങ്ങില്‍ ഉച്ചയ്ക്ക് 12 മുതല്‍ ഒരുമണിവരെയാണ് പ്രധാനമന്ത്രി പങ്കെടുക്കുക. ഉച്ചയ്ക്ക് 1.20ന് തിരുവനന്തപുരത്തുനിന്ന് വിവിധ പദ്ധതികളുടെ ഉദ്ഘാടനത്തിനായി തമിഴ്‌നാട്ടിലേക്ക് പോകും. 28ന് ഉച്ചയ്ക്ക് തിരുനെല്‍വേലിയില്‍നിന്ന് ഹെലികോപ്റ്ററില്‍ തിരുവനന്തപുരം വ്യോമസേന ടെക്‌നിക്കല്‍ ഏര്യയില്‍ തിരിച്ചെത്തും. തുടര്‍ന്ന് മഹാരാഷ്ട്രയിലേക്ക് പോകും.