കുട്ടികളുടെ ലൈംഗിക ദൃശ്യങ്ങൾ: 10 പേർ പിടിയിൽ; ഓപ്പറേഷൻ പി ഹണ്ടുമായി വീണ്ടും പോലീസ്

തിരുവനന്തപുരം: കുട്ടികളുടെ ലൈംഗിക ദൃശ്യങ്ങൾ ഡൗൺലോഡ് ചെയ്യുകയും പ്രചരിപ്പിക്കുകയും ചെയ്യുന്നവരെ കണ്ടെത്താനായി നടത്തിയ പരിശോധനയിൽ 10 പേർ അറസ്റ്റിൽ. സംസ്ഥാന വ്യാപകമായി നടത്തിയ റെയ്ഡില്‍ 46 കേസുകളും രജിസ്റ്റർ ചെയ്തു. കേരള പോലീസും സൈബർ ഡോമും സംയുക്തമായി നടത്തുന്ന ഓപ്പറേഷൻ പി ഹണ്ടിൻ്റെ ഭാഗമായിട്ടാണ് പരിശോധന.

മലപ്പുറം ജില്ലയിലാണ് ഏറ്റവും കൂടുതൽ പേർ പിടിയിലായത്. മലപ്പുറത്ത് നാലും ഇടുക്കിയിലും കൊച്ചി സിറ്റിയിലും രണ്ടുപേർ വീതവും പോലീസ് പിടിയിലായി. എറണാകുളം റൂറൽ, ആലപ്പുഴ എന്നീ ജില്ലകളിൽ നിന്നും ഓരാൾ വീതവും അറസ്റ്റിലായി. ദൃശ്യങ്ങൾ ശേഖരിക്കാൻ ഉപയോഗിച്ച 123 ഇലക്ട്രോണിക് ഉപകരണങ്ങളും പോലീസ് പിടിച്ചെടുത്തു.

സംസ്ഥാന വ്യാപകമായി 14 ജില്ലകളിലുമായി 389 കേന്ദ്രങ്ങളിലാണ് ഓപ്പറേഷൻ പി ഹണ്ടിൻ്റെ ഭാഗമായി പരിശോധന നടത്തിയത്. കുട്ടികളുടെ അശ്ലീലചിത്രങ്ങൾ ഇന്‍റർനെറ്റിൽ സെർച്ച് ചെയ്യുക, മൊബൈൽ ഫോണിലും കംപ്യൂട്ടറിലും ഡൗൺലോഡ് ചെയ്ത്, സൂക്ഷിക്കുക, കൈമാറ്റം ചെയ്യുക തുടങ്ങിയവ കണ്ടെത്തുന്ന സൈബർ പരിശോധയാണ് ഓപ്പറേഷൻ പി ഹണ്ട്. അടുത്തിടെ നടന്ന പരിശോധനകളിൽ നൂറുകണക്കിനാളുകളാണ് ഇതുവരെ അറസ്റ്റിലായിട്ടുള്ളത്