കണ്ണവത്തെ യുവതിയെ കണ്ടെത്തി; ആണ്‍സുഹൃത്തിനൊപ്പം പേരാവൂര്‍ കോളനിയില്‍; ട്രോളി ബാഗിലെ മൃതദേഹം തിരിച്ചറിയല്‍ സങ്കീര്‍ണ്ണമാകുന്നു

കണ്ണൂര്‍: കണ്ണവത്ത് കാണാതായ യുവതിയെ ആണ്‍സുഹൃത്തിനൊപ്പം കണ്ടെത്തിയെന്ന് കണ്ണവം പോലീസ്. പേരാവൂര്‍ മുരിങ്ങോടിയിലെ പാറങ്ങോട്ട് കോളനിയിലാണ് യുവതിയുണ്ടായിരുന്നത്. തൊടീക്കളം കോളനിയിലെ 31 കാരിയെ കാണാനില്ലെന്നു കണ്ണവം പോലീസില്‍ പരാതി നല്‍കിയിരുന്നു, ഇതിനെ തുടര്‍ന്ന് അന്വേഷണം നടക്കുകയായിരുന്നു. ഇരുവരേയും പോലീസ് തളിപ്പറമ്പ് കോടതിയില്‍ ഹാജരാക്കിയതിനെ തുടര്‍ന്ന് യുവതിയുടെ ആവശ്യപ്രകാരം ആണ്‍സുഹൃത്തിനൊപ്പം പോകാന്‍ കോടതി അനുവദിച്ചു.

കണ്ണവത്തെ യുവതിയ്ക്കായുള്ള അന്വേഷണം പോലീസ് നടത്തുമ്പോഴാണ് മാക്കൂട്ടംചുരം വനത്തിനുള്ളില്‍ ട്രോളിബാഗില്‍ യുവതിയുടെ മൃതദേഹം കണ്ടെത്തിയത്. ഈ മൃതദേഹം കണ്ണവത്തെ യുവതിയുടേതാണെന്ന് സംശയമുണ്ടായിരുന്നു. കര്‍ണാടക പോലീസ് ഈ കാര്യത്തില്‍ അന്വേഷണം നടത്തുകയായിരുന്നു.

യുവതിയുടെ ബന്ധുക്കള്‍ വീരാജ്‌പേട്ടയിലെത്തി മൃതദേഹം കണ്ടെങ്കിലും അത് യുവതിയുടേതല്ലെന്ന നിഗമനത്തിലാണ് എത്തിയിരുന്നത്. എങ്കിലും കര്‍ണാടക പോലീസ് ഡിഎന്‍എ ടെസ്റ്റിലേക്ക് നീങ്ങാന്‍ തീരുമാനിക്കുകയായിരുന്നു. ഈ ഘട്ടത്തില്‍ തന്നെയാണ് യുവതിയെ ആണ്‍ സുഹൃത്തിനൊപ്പം കണ്ടെത്തിയത്.

മാക്കൂട്ടംചുരം വനത്തിനുള്ളില്‍ ട്രോളിബാഗില്‍ കണ്ടെത്തിയ യുവതിയുടെ മൃതദേഹം തിരിച്ചറിയല്‍ സങ്കീര്‍ണ്ണമായിരിക്കുകയാണ്. കാണാതായ യുവതികളെക്കുറിച്ചുള്ള പരാതികള്‍ ആസ്പദമാക്കിയാണ് കര്‍ണാടക പോലീസിന്റെ അന്വേഷണം മുന്നോട്ട് നീങ്ങുന്നത്. മൃതദേഹം കാണപ്പെട്ടത് പുതുതായി വാങ്ങിയ ട്രോളി ബാഗില്‍ ആയതിനാല്‍ അതിനെക്കുറിച്ചും അന്വേഷണം നടക്കുന്നുണ്ട്.