ന്യൂസ് ക്ലിക്ക് സ്ഥാപകനെ അടിയന്തരമായി വിട്ടയക്കണമെന്ന് സുപ്രീംകോടതി; പുരകായസ്തയുടെ അറസ്റ്റ് നിയമവിരുദ്ധം; നടന്നത് സ്വാഭാവിക നീതിയുടെ ലംഘനം

ഡല്‍ഹി: യുഎപിഎ കേസില്‍ അറസ്റ്റിലായ ന്യൂസ് ക്ലിക്ക് സ്ഥാപകന്‍ പ്രബീര്‍ പുരകായസ്തയെ അടിയന്തരമായി വിട്ടയക്കണമെന്ന് സുപ്രീംകോടതി. അറസ്റ്റ് നിയമവിരുദ്ധമാണെന്ന് ജസ്റ്റിസ് ബി.ആര്‍.ഗവായ്, സന്ദീപ് മേത്ത എന്നിവരുടെ ബെഞ്ച് നിരീക്ഷിച്ചു.

റിമാന്‍ഡ് അപേക്ഷയുടെ കോപ്പി പ്രബീറിനോ അഭിഭാഷകനോ നല്‍കിയിരുന്നില്ല. ഇത് സ്വാഭാവിക നീതിയുടെ നിഷേധമാണ്. അറസ്റ്റ് നടപടികളിലെ വീഴ്ച ചൂണ്ടിക്കാട്ടിയാണ് കോടതി നടപടി.

ഡല്‍ഹി പോലീസ് എടുത്ത യുഎപിഎ കേസ് റദ്ദാക്കണമെന്ന് ആവശ്യപ്പെട്ട് പ്രബീര്‍ പുരകായസ്ത സുപ്രീംകോടതിയെ സമീപിച്ചിരുന്നു. എഫ്ഐആര്‍ റദ്ദാക്കണമെന്ന ആവശ്യം ഡല്‍ഹി ഹൈക്കോടതി തള്ളിയതിന് പിന്നാലെയാണിത്. മുതിര്‍ന്ന അഭിഭാഷകന്‍ കപില്‍ സിബലാണ് പ്രബീറിനുവേണ്ടി ഹാജരായത്.