പ്രിയങ്കയുടെ കസവുസാരി ഇന്ദിരയെ ഓർമ്മിപ്പിക്കുന്നു എന്ന് സോഷ്യൽ മീഡിയ; അച്ഛനെയും മുത്തശ്ശിയെയും ഓർത്തുവെന്ന് പുതിയ എംപിയുടെ പ്രതികരണം

കേരളത്തിൻ്റെ സാംസ്കാരിക ഐക്യത്തിൻ്റെ പ്രതീകമായ കസവുസാരിയിൽ ഇന്ദിരാഗാന്ധിയെ ഓർമ്മപ്പെടുത്തി വയനാട് എംപി പ്രിയങ്ക ഗാന്ധി. കസവു സാരിയിൽ ഭരണഘടന ഉയർത്തിപ്പിടിച്ചായിരുന്നു കോൺഗ്രസ് നേതാവ് ഇന്ന് സത്യപ്രതിജ്ഞ ചെയ്തത്. കേരള കസവുസാരി ധരിച്ചെത്തിയ പ്രിയങ്ക പാർലമെൻ്റിൽ പരമ്പരാഗത സാരികളിൽ പ്രത്യക്ഷപ്പെടാറുള്ള മുത്തശ്ശി മുൻ പ്രധാനമന്ത്രി ഇന്ദിരാ ഗാന്ധിയെ അനുസ്മരിപ്പിച്ചു. മുമ്പും പലപ്പോഴും പ്രിയങ്കയേയും ഇന്ദിരയയും തമ്മിലുള്ള സാമ്യം നിരവധിപ്പേർ ചൂണ്ടിക്കാട്ടിയിട്ടുണ്ട്. എന്നാൽ തൻ്റെ ആദ്യ സത്യപ്രതിജ്ഞാ ചടങ്ങിലെ പ്രിയങ്കയുടെ വേഷം ഇന്ദിരാഗാന്ധിയുയുള്ള അസാധാരണ സാമ്യം അടയാളപ്പെടുത്തുന്നു.

ശക്തയായ വ്യക്തിത്വത്തിന് പേരുകേട്ട ഇന്ദിരാഗാന്ധിക്ക് സാധാരണക്കാരോട് സംവദിക്കാനാണ് ഇത്തരത്തിൽ തൻ്റെ വസ്ത്രധാരണത്തെ ഉപയോഗിച്ചിരുന്നത്. പ്രിയങ്കയും സത്യപ്രതിജ്ഞാ ദിവസം കേരള കസവുസാരി തിരഞ്ഞെടുത്തതിന് പിന്നിലും അതേകാരണമാണ് ഉളഉതെന്ന് വേണം കരുതാൻ. തന്നെ പ്രതിനിധിയായി തിരഞ്ഞെടുത്ത വയനാട്ടിലെ ജനങ്ങൾക്കുള്ള ആദരവോടെയുള്ള അംഗീകാരം കൂടിയാണത്.

സത്യപ്രതിജ്ഞാ ചടങ്ങിനിടെ മുത്തശ്ശിയെ ഓർമ്മയുണ്ടോ എന്ന് ഒരു മാധ്യമ പ്രവർത്തകൻ ചോദിച്ചപ്പോൾ, ‘അതെ, എൻ്റെ മുത്തശ്ശിയേയും അച്ഛനെയും ഓർത്തു’ – എന്നായിരുന്നു പ്രിയങ്കയുടെ മറുപടി. അമ്മ സോണിയ ഗാന്ധി, സഹോദരൻ രാഹുൽ ഗാന്ധി, മക്കളായ റൈഹാൻ വദ്ര, മിരായ വാദ്ര എന്നിവരുൾപ്പെടെ കുടുംബസമേതമാണ് വയനാട് എംപി എത്തിയത്. വയനാട്, റായ്ബറേലി എന്നീ മണ്ഡലങ്ങളിൽ നിന്നും കഴിഞ്ഞ ലോക്സഭാ തിരഞ്ഞെടുപ്പിൽ രാഹുൽ ഗാന്ധി തിരഞ്ഞെടുക്കപ്പെട്ടിരുന്നു. കുടുംബ മണ്ഡലമായ റായ്ബറേലി അദ്ദേഹം നിലനിർത്തിയതോടെ വയനാട്ടിൽ നടന്ന ഉപതിരഞ്ഞെടുപ്പിൽ പ്രീയങ്ക തൻ്റെ കന്നി അങ്കത്തിനിറങ്ങുകയായിരുന്നു. ഇടതുപക്ഷ ജനാധിപത്യ മുന്നണി സ്ഥാനാർത്ഥിയായ സിപിഐ നേതാവ് സത്യൻ മൊകേരിയെ 4,10,931 വോട്ടുകളുടെ ഭൂരിപക്ഷത്തിൽ പരാജയപ്പെടുത്തിയാണ് പ്രിയങ്ക സീറ്റ് നിലനിർത്തിയത്.