നടുറോഡിൽ പടക്കം പൊട്ടിച്ച യുവാവിന് ദാരുണാന്ത്യം; സിസിടിവി ദൃശ്യങ്ങൾ പുറത്ത്

ദീപാവലിയുടെ തലേന്ന് റോഡിൽ പടക്കം പൊട്ടിച്ച് ആഘോഷിച്ച 35കാരൻ കാറിടിച്ചു മരിച്ചു. സോഹം പട്ടേൽ എന്നയാളാണ് കൊല്ലപ്പെട്ടത്. മഹാരാഷ്ട്രയിലെ പൂനെയിലാണ് സംഭവം. പിംപ്രി-ചിഞ്ച്‌വാഡ് മേഖലയിൽ റോഡിൽ പടക്കം പൊട്ടിക്കുന്നതിനിടെ അമിതവേഗതയിലെത്തിയ കാർ യുവാവിനെ ഇടിച്ചു തെറിപ്പിക്കുകയായിരുന്നു.

നവംബർ 30ന് നടന്ന അപകടത്തിൻ്റെ സിസിടിവി ദൃശ്യങ്ങൾ പുറത്തായിട്ടുണ്ട്. സോനം പട്ടേലിനെ ഇടിച്ച് തെറിപ്പിച്ച കാർ നിർത്താതെ പോകുകയായിരുന്നു. ഇതുവരെ പ്രതിയെയോ ഇടിച്ചിട്ട വാഹനത്തെയോ പോലീസിന് കണ്ടെത്താനായിട്ടില്ല. അപകടത്തിൽ അജ്ഞാതനായ ഡ്രൈവർക്കെതിരെ റാവെറ്റ് പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.

ദീപാവലി ആഘോഷങ്ങളുമായി ബന്ധപ്പെട്ട് നിരവധി അപകടങ്ങാണ് മഹാരാഷ്ട്രയിൽ റിപ്പോർട്ട് ചെയ്തിരുന്നത്. പൂനെയിലെ സിംഗ്ഗഡ് പ്രദേശത്ത് പടക്കം പൊട്ടിച്ചപ്പോൾ ഡ്രെയിൻ ചേമ്പറിൻ്റെ അടപ്പ് പൊട്ടിത്തെറിച്ച് അഞ്ച് കുട്ടികൾക്ക് പരിക്കേറ്റിരുന്നു. പടക്കം പൊട്ടിക്കുന്നതുമായി ബന്ധപ്പെട്ട് ഉണ്ടായ തർക്കത്തിൽ അമോൽ വാഗ്മർ എന്ന 25കാരൻ കുത്തേറ്റ് മരിച്ചിരുന്നു.