വ്യാപാരിയെ കഴുത്തറത്ത് കൊന്ന കേസില്‍ പ്രതി പിടിയില്‍; പിടിയിലായത് ക്രിമിനല്‍ പശ്ചാത്തലമുള്ള അമ്പിളി

തിരുവനന്തപുരത്തെ ഞെട്ടിച്ച ക്രഷർ ഉടമ ദീപുവിന്റെ കൊലപാതകത്തില്‍ പ്രതി പിടിയില്‍. തിരുവനന്തപുരം മലയം സ്വദേശി അമ്പിളിയെന്ന ഷാജിയെയാണ് പൊലീസ് കസ്റ്റഡിയിലെടുത്തത്. ക്രിമിനല്‍ പശ്ചാത്തലമുള്ള അമ്പിളി വേറെയും കൊലക്കേസിലെ പ്രതിയാണെന്ന് പൊലീസ് അറിയിച്ചു. ചോദ്യംചെയ്യൽ തുടരുകയാണെന്നും അറസ്റ്റ് ഉടൻ രേഖപ്പെടുത്തുമെന്നും പൊലീസ് അറിയിച്ചു.

കരമന സ്വദേശിയായ ദീപു കളിയിക്കാവിളയിൽ കഴിഞ്ഞ ദിവസമാണ് കൊല്ലപ്പെട്ടത്. കളിയിക്കാവിള പൊലീസ് സ്റ്റേഷന് 200 മീറ്റർ അകലെ കാറിനുള്ളിൽ കഴുത്തറുത്ത നിലയിലാണ് മൃതദേഹം കണ്ടെത്തിയത്.

പോലീസ് പട്രോളിംഗിനിടെ ബോണറ്റ് പൊക്കിയ നിലയില്‍ കാര്‍ കണ്ടെത്തിയതോടെ നടത്തിയ പരിശോധനയിലാണ് കൊലപാതക വിവരം വെളിയില്‍ വന്നത്. സീറ്റ് ബെൽറ്റ് ഇട്ട നിലയിലായിരുന്നു മൃതദേഹം കണ്ടത്. വാഹനം ഓഫ് ചെയ്തിരുന്നില്ല. പണത്തിന് വേണ്ടി ചിലർ ദീപുവിനെ ഭീഷണിപ്പെടുത്താറുണ്ടായിരുന്നു എന്ന് ഭാര്യയും സുഹൃത്തുക്കളും പോലീസിന് മൊഴി നല്‍കിയിരുന്നു. കേസില്‍ അന്വേഷണം നടക്കുകയാണ്.