ഇടതില്ലെങ്കില്‍ ഇന്ത്യയില്ലെന്നു പറഞ്ഞവര്‍ തിരഞ്ഞെടുപ്പ് സമയത്ത് ലോകം ചുറ്റുന്ന; മുഖ്യമന്ത്രിയുടെ രഹസ്യയാത്ര എന്തിന്; വിമര്‍ശിച്ച് സതീശന്‍

തിരുവനന്തപുരം : ഇടതില്ലെങ്കില്‍ ഇന്ത്യയില്ലെന്നു പറഞ്ഞവര്‍ തിരഞ്ഞെടുപ്പ് സമയത്ത് ലോകം ചുറ്റാന്‍ ഇറങ്ങിയിരിക്കുയാണെന്ന് പ്രതിപക്ഷ നേതാവ് വിഡി സതീശന്‍. കേരളത്തിലെ തിരഞ്ഞെടുപ്പ് കഴിഞ്ഞതോടെ സിപിഎമ്മിന്റെ ഏക മുഖ്യമന്ത്രി വിദേശത്ത് പോയി. പി.ബി അംഗം കൂടിയായ പിണറായി വിജയന്‍ ബംഗാളിലോ ത്രിപുരയിലോ പോലും പ്രചരണത്തിന് പോയില്ല. ബിജെപിയെ പേടിച്ച് പ്രചരണത്തിന് ഇറങ്ങാതിരിക്കാനാണോ പിണറായി വിദേശത്തേക്ക് പോയതെന്നും സതീശന്‍ പരിഹസിച്ചു.മ ുഖ്യമന്ത്രിയും മന്ത്രിമാരും അതീവ രഹസ്യമായി യാത്ര നടത്തിയത് എന്തിനെന്ന് മനസിലായിട്ടില്ല. ഭരണഘടനാ സ്ഥാനത്തിരിക്കുന്നവര്‍ എന്ത് ചെയ്യുമ്പോഴും സുതാര്യത ഉറപ്പാക്കേണ്ടതുണ്ട്. അല്ലെങ്കില്‍ പല വിധ സംശയങ്ങള്‍ക്കും ഇടവരുത്തുമെന്നും സതീശന്‍ പറഞ്ഞു.

16 ദിവസം മുഖ്യമന്ത്രി സംസ്ഥാനത്ത് ഉണ്ടാകില്ലെന്നാണ് വിവരം. മുഖ്യമന്ത്രിയുടെ അസാന്നിധ്യത്തില്‍ പകരം ചുമതല ഒരു മന്ത്രിക്കും നല്‍കാത്തത് എന്തുകൊണ്ടാണെന്നും സതീശന്‍ ചോദിച്ചു. ചുമതല ഏല്‍പ്പിക്കാന്‍ പറ്റുന്ന തരത്തില്‍ മുഖ്യമന്ത്രിക്ക് വിശ്വാസമുള്ള ആരും ഈ മന്ത്രിസഭയില്‍ ഇല്ലെങ്കില്‍ കൂട്ടുത്തരവാദിത്തത്തെ കുറിച്ച് സംശയിക്കേണ്ടിയിരിക്കുന്നു.

ഇതുവരെയില്ലാത്ത പ്രതിസന്ധിയിലൂടെയാണ് സംസ്ഥാനം കടന്നു പോകുന്നത്. ഡ്രൈവിംഗ് ടെസ്റ്റുകള്‍ അവതാളത്തിലായതോടെ പത്ത് ലക്ഷത്തോളം പേരാണ് ലൈസന്‍സിനായി കാത്തിരിക്കുന്നത്. തീരുമാനം എടുക്കേണ്ട വകുപ്പ് മന്ത്രി വിദേശത്താണ്. ജനങ്ങളെ നേരിട്ടു ബാധിക്കുന്ന വിഷയങ്ങളില്‍ അടിയന്തര തീരുമാനങ്ങളെടുക്കേണ്ട സാഹചര്യത്തില്‍ മന്ത്രിസഭായോഗം പോലും ചേരുന്നില്ല. ജനകീയ വിഷയങ്ങളൊന്നും ഈ സര്‍ക്കാരിന്റെ മുന്‍ഗണനകളിലും പരിഗണനയിലും ഇല്ലെന്നത് ഖേദകരമാണ്. എന്തുകൊണ്ടാണ് മന്ത്രിസഭാ യോഗം ചേരാത്തതെന്ന് വ്യക്തമാക്കണമെന്നും സതീശന്‍ ആവശ്യപ്പെട്ടു.