ഇംഗ്ലണ്ടിൽ മലയാളി മെത്രാനെതിരെ ലൈംഗിക ആരോപണം; ബിഷപ്പ് ജോണ്‍ പെരുമ്പളത്തിനെതിരെ വനിത ബിഷപ്പ് അടക്കം രണ്ടുപേർ രംഗത്ത്

ബ്രിട്ടനിലെ ചര്‍ച്ച് ഓഫ് ഇംഗ്ലണ്ട് (Church of England) സഭയിലെ മലയാളി ബിഷപ്പിനെതിരെ ലൈംഗിക ആരോപണവുമായി രണ്ട് സ്ത്രീകള്‍ രംഗത്ത്. പരാതി നല്‍കിയതില്‍ ഒരാള്‍ വനിതാ ബിഷപ്പാണ്. ലൈംഗികമായി ചൂഷണം ചെയ്തു എന്ന ആരോപണമാണ് വനിതാ ബിഷപ്പ് ഉയര്‍ത്തിയിരിക്കുന്നത്. മറ്റൊരു സ്ത്രീ കയറിപ്പിടിച്ചു എന്ന പരാതിയാണ് 59 കാരനായ ജോണ്‍ പെരുമ്പളത്തിനെതിരെ ഉന്നയിച്ചിരിക്കുന്നത്.

ലിവര്‍പൂള്‍ ബിഷപ്പായ ഡോ. ജോണ്‍ പെരുമ്പളത്ത് (Dr. John Perumbalath) വയനാട്- മാനന്തവാടി സ്വദേശിയാണ്. ചര്‍ച്ച് ഓഫ് നോര്‍ത്ത് ഇന്ത്യ (സിഎന്‍ഐ) സഭയിലെ വൈദികനായി പൗരോഹിത്യ ജീവിതമാരംഭിച്ച ഇദ്ദേഹം 2001ലാണ് ഇംഗ്ലണ്ടിലെത്തിയത്. ഇംഗ്ലണ്ടിലെ പ്രശസ്ത വാര്‍ത്താ ചാനലായ ചാനല്‍ 4 (Channel 4) നടത്തിയ അന്വേഷണത്തിലാണ് ബിഷപ്പ് ജോണ്‍ കുടുങ്ങിയത്.

2023ല്‍ എസെക്‌സില്‍ വെച്ചാണ് രണ്ട് ലൈംഗിക അതിക്രമങ്ങളും ഉണ്ടായതെന്നാണ് ചാനല്‍4 പറയുന്നത്. എസെക്‌സ് ചെംസ്‌ഫോര്‍ഡ് രൂപതാ ബിഷപ്പായിരുന്ന കാലത്ത് ഒരു സ്ത്രീയെ അവരുടെ അനുവാദമില്ലാതെ ചുംബിക്കുകയും കയറിപ്പിടിക്കുകയും ചെയ്തുവെന്നാണ് ആദ്യം പരാതി ഉയർന്നത്. ഇതേ കാലഘട്ടത്തില്‍ വനിത ബിഷപ്പിന് നേരെയും ലൈംഗിക അതിക്രമം നടത്തിയെന്ന് പരാതി ഉണ്ടായിരുന്നു. ഇവർ രണ്ടുപേരും ചാനൽ 4ൽ നേരിട്ടെത്തി ഇക്കാര്യം തുറന്ന് പറഞ്ഞതാണ് ബിഷപ്പിന് കുരുക്കായത്.

ഇതോടെ ബിഷപ്പ് ജോണിന്റെ രാജിക്കായി സമ്മര്‍ദ്ദം ശക്തമായിട്ടുണ്ട്. കുട്ടികളെ ലൈംഗികമായി പീഡിപ്പിച്ച വൈദികര്‍ക്കെതിരെ ഉയര്‍ന്ന പരാതിയില്‍ നടപടി എടുക്കാതെ പൂഴ്ത്തിവെച്ചത് പുറത്തായതോടെ ചര്‍ച്ച് ഓഫ് ഇംഗ്ലണ്ടിന്റെ മേലധ്യക്ഷൻ കാന്റര്‍ബറി ആര്‍ച്ച് ബിഷപ്പ് ജസ്റ്റിന്‍ വില്‍ബി രാജിവച്ച് ഒഴിഞ്ഞത് രണ്ടുമാസം മുമ്പാണ്‌. ഇപ്പോള്‍ ലിവര്‍പൂള്‍ ബിഷപ്പിനെതിരെയും ലൈംഗിക അതിക്രമ പരാതി ഉയര്‍ന്നതോടെ സഭ ഒന്നാകെ നാണംകെട്ട് നില്‍ക്കയാണ്.

ബ്രിട്ടന്റെ ഔദ്യോഗിക സഭയാണ് ചര്‍ച്ച് ഓഫ് ഇംഗ്ലണ്ട്. ബ്രിട്ടീഷ് രാജകുടുംബത്തിലെ കിരീടാവകാശികളെ വാഴിക്കുന്നത് സഭയുടെ അധ്യക്ഷനായ കാന്റന്‍ബറി ആര്‍ച്ച് ബിഷപ്പാണ്. ഇവര്‍ക്ക് ബ്രിട്ടീഷ് പാര്‍ലമെന്റിലെ ഉപരിസഭയായ (ഇന്ത്യയിലെ രാജ്യസഭയ്ക്ക് തുല്യമായ സഭ) പ്രഭു സഭയില്‍ അംഗത്വത്തിന് വരെ സാധ്യതയുണ്ട്. അതുകൊണ്ട് തന്നെ ചര്‍ച്ച് ഓഫ് ഇംഗ്ലണ്ടില്‍ ബിഷപ്പ് പദവി ഏറെ പ്രാധാന്യമുള്ളതാണ്. ഡോ ജോണ്‍ പെരുമ്പളത്തെ കൂടാതെ മറ്റൊരു മലയാളി ബിഷപ്പ് കൂടി ചര്‍ച്ച് ഓഫ് ഇംഗ്ലണ്ടിലുണ്ട്. ലെസ്റ്ററിലെ ലഫ്ബറോ രൂപതയുടെ സഫ്രഗന്‍ ബിഷപ്പ് കൊല്ലം സ്വദേശി സാജു മുതലാളി.

തനിക്കെതിരെ ഉയര്‍ന്ന ലൈംഗിക ആരോപണങ്ങള്‍ നിഷേധിച്ച ബിഷപ്പ് ജോണ്‍ പെരുമ്പളത്ത് രംഗത്തെത്തിയിട്ടുണ്ട്. നാഷണല്‍ സേഫ്ഗാര്‍ഡിംഗ് ടീമിന്റെ (National Safeguarding Team) എല്ലാ വിധത്തിലുള്ള അന്വേഷണവുമായി സഹകരിക്കാന്‍ തയ്യാറാണ്. ഈ അനുഭവങ്ങളിലൂടെ താന്‍ പല പാഠങ്ങളും പഠിച്ചു എന്നും അദ്ദേഹം പ്രതികരിച്ചു. ചര്‍ച്ച് ഓഫ് ഇംഗ്ലണ്ട് അധികൃതര്‍ ബിഷപ്പ് ജോണിന് പ്രതിരോധം തീര്‍ത്ത് രംഗത്തുണ്ട്. അതേസമയം വനിത ബിഷപ്പ് ഉയര്‍ത്തിയ പരാതിയിൽ ഗൗരവമായ അന്വേഷണം വേണമെന്ന് വിശ്വാസികളും സഭാ അധികൃതരും ആവശ്യപ്പെടുന്നുണ്ട്.