സൗബിന്‍ ഷാഹിറിന്റെ ‘മച്ചാന്റെ മാലാഖ’ തിയറ്ററുകളിലേക്ക്; റിലീസ് പ്രഖ്യാപിച്ചു; ഏറ്റുമുട്ടാന്‍ കുഞ്ചാക്കോ ബോബനും സുരാജ് വെഞ്ഞാറമൂടും
സൗബിന്‍ ഷാഹിര്‍, ധ്യാന്‍ ശ്രീനിവാസന്‍ എന്നിവരെ കേന്ദ്രകഥാപാത്രങ്ങളാക്കി ബോബന്‍ സാമുവല്‍ സംവിധാനം ചെയ്യുന്ന ചിത്രമാണ് മച്ചാന്റെ മാലാഖ. ചിത്രത്തിന്റെ റിലീസ് തിയതി പ്രഖ്യാപിച്ചു. ജൂണ്‍ 14ന് മച്ചാന്റെ മാലാഖ തിയറ്ററുകളില്‍ എത്തും. നമിത പ്രമോദ് ആണ് ചിത്രത്തിലെ നായിക വേഷം കൈകാര്യം ചെയ്യുന്നത്.
കെഎസ്ആര്‍ടിസി ബസിലെ കണ്ടക്ടര്‍ ആയാണ് സൗബിന്‍ ചിത്രത്തില്‍ വേഷമിടുന്നത്. സൗബിന്‍ ഷാഹിറും ധ്യാന്‍ ശ്രീനിവാസനും ആദ്യമായി ഒന്നിക്കുന്ന ചിത്രം എന്ന പ്രത്യേകതയും മച്ചാന്റെ മാലാഖയ്ക്കുണ്ട്. റോമന്‍സ് പോലുള്ള ചിത്രങ്ങളിലൂടെ പ്രേക്ഷകരെ പൊട്ടിച്ചിരിപ്പിച്ച ബോബന്‍ സാമുവല്‍ ഇക്കുറിയും തമാശയുടെ അകമ്പടിയോടെയാണ് ചിത്രം ഒരുക്കിയിരിക്കുന്നത്. ജെക്സണ്‍ ആന്റണിയുടെ കഥയ്ക്ക് അജീഷ് പി തോമസാണ് തിരക്കഥ ഒരുക്കിയിരിക്കുന്നത്. പ്രശസ്ത സംഗീത സംവിധായകന്‍ ഔസേപ്പച്ചനാണ് ചിത്രങ്ങളുടെ സൗണ്ട് ട്രാക്കുകള്‍ ഒരുക്കിയിരിക്കുന്നത്. വിനീത് തട്ടില്‍, ശാന്തി കൃഷ്ണ, മനോജ് കെ യു, ദിലീഷ് പോത്തന്‍ എന്നിവരാണ് മച്ചാന്റെ മാലാഖയുടെ ശ്രദ്ധേയമായ താരങ്ങള്‍.
ജൂണിലെ മറ്റൊരു പ്രധാന റിലീസ് കുഞ്ചാക്കോ ബോബനും സുരാജ് വെഞ്ഞാറമൂടും മുഖ്യ വേഷങ്ങളില്‍ എത്തുന്ന ഗര്‍ര്‍ര്‍ ആണ്. ഷെയ്ന്‍ നിഗം, മഹിമ നമ്പ്യാര്‍ എന്നിവര്‍ അഭിനയിക്കുന്ന ലിറ്റില്‍ ഹേര്‍ട്ട്‌സ് എന്ന ചിത്രം ജൂണ്‍ 7ന് റിലീസിനെത്തും. സാന്ദ്രാ തോമസാണ് ലിറ്റില്‍ ഹേര്‍ട്ട്‌സ് നിര്‍മിക്കുന്നത്.
കേരളം ചർച്ച ചെയ്യാനിരിക്കുന്ന വലിയ വാർത്തകൾ ആദ്യം അറിയാൻ മാധ്യമ സിൻഡിക്കറ്റ് വാട്സ്ആപ്പ് ഗ്രൂപ്പിൽ ജോയിൻ ചെയ്യാം
Click here
