സുധ കൊങ്കരയുടെ പുതിയ ചിത്രം ‘സൂര്യ 43’, ദുല്‍ഖര്‍ സല്‍മാനും നസ്രിയയും

തമിഴ് സൂപ്പര്‍ സ്റ്റാര്‍ സൂര്യയുടെ 43 മത് ചിത്രമായ ‘സൂര്യ 43’ യില്‍ ദുല്‍ഖര്‍ സല്‍മാനും നസ്രിയയും. ‘സൂരറൈ പോട്ര്’ എന്ന സൂപ്പര്‍ ഹിറ്റ് ചിത്രത്തിന് ശേഷം സുധ കൊങ്കര സൂര്യയെ കേന്ദ്ര കഥാപാത്രമാക്കി ഒരുക്കുന്ന രണ്ടാമത്തെ ചിത്രമാണിത്. മലയാളി താരമായ അപര്‍ണ ബാലമുരളി ആയിരുന്നു സൂരറൈ പോട്രില്‍ സൂര്യയുടെ നായിക.

‘്#Suriya43’ എന്ന് താല്‍ക്കാലികമായി പേരിട്ടിരിക്കുന്ന ചിത്രം സൂര്യയുടെ പ്രൊഡക്ഷന്‍ ഹൗസായ 2ഡി എന്റര്‍ടൈന്‍മെന്റിന് ബാനറില്‍ സൂര്യ, ജ്യോതിക,രാജ്‌ശേഖര്‍ കര്‍പൂര സുന്ദരപാണ്ഡ്യന്‍ എന്നിവര്‍ ചേര്‍ന്നാണ് നിര്‍മ്മിക്കുന്നത്. ദുല്‍ഖറും സൂര്യയും ഒന്നിക്കുന്ന ആദ്യ തമിഴ് ചിത്രമാണിത്. നേരത്തെ ചിത്രത്തില്‍ ദുല്‍ഖര്‍ സല്‍മാന്‍ ഉണ്ടാകുമെന്ന വാര്‍ത്തകള്‍ പുറത്തുവന്നിരുന്നു. ഇപ്പോള്‍ ഇക്കാര്യം ഔദ്യോഗികമായി സ്ഥിരീകരിക്കുകയാണ്. ദുല്‍ഖര്‍ സല്‍മാന്‍ തന്നെയാണ് ചിത്രത്തിന്റെ അനൗണ്‍സ്‌മെന്റ് വീഡിയോ സോഷ്യല്‍ മീഡിയയിലൂടെ പുറത്തുവിട്ടത്. വിജയ് വര്‍മയാണ് നെഗറ്റിവ് റോളില്‍ അഭിനയിക്കുന്നത്. ജി വി പ്രകാശാണ് സംഗീതം.

അതേസമയം, അനൌണ്‍സ്‌മെന്റ് വീഡിയോയില്‍ ‘പുറനാന്നൂറ് (Purananooru)’, എന്ന് രേഖപ്പെടുത്തിയിട്ടുണ്ട്. ഇതാണോ ചിത്രത്തിന്റെ പേര് എന്ന കാര്യത്തില്‍ വ്യക്തതയില്ല. ഒരു ക്ലാസിക് തമിഴ് സാഹിത്യകൃതിയാണ് ‘പുറനാന്നൂറ് ‘. പ്രണയം, യുദ്ധം, ആദ്യകാല തമിഴ് സമൂഹത്തിന്റെയും സംസ്‌കാരത്തിന്റെയും മറ്റ് വശങ്ങള്‍ എന്നിവയ്ക്ക് പേരുകേട്ടതാണ് ഈ കൃതി.