വീടില്ലാത്തതിനാൽ ഫുട്പാത്തിൽ ഉറങ്ങിയവരുടെ മേൽ ട്രക്ക് പാഞ്ഞുകയറി; മൂന്ന് മരണം

ഡൽഹി ശാസ്ത്രി പാർക്കിൽ ഉറങ്ങിക്കിടന്നവരുടെ മേൽ ട്രക്ക് പാഞ്ഞ് കയറി മൂന്ന് മരണം. മെട്രോ സ്റ്റേഷന് സമീപമുള്ള ടാർബുസ് മാർക്കറ്റിൽ പുലർച്ചെ നാലരയോടെയാണ് അപകടമുണ്ടായത്.

അഞ്ച് പേരുടെ ശരീരത്തിലേക്കാണ് ട്രക്ക് കയറിയത് ഇവരെ ഉടൻ ജഗ് പ്രവേഷ് ചന്ദ്ര ആശുപത്രിയിൽ എത്തിച്ചെങ്കിലും മൂന്ന് പേരുടെ ജീവൻ രക്ഷിക്കാനായില്ല. അപകട ശേഷം ഡ്രൈവർ ഓടി രക്ഷപ്പെട്ടു. മരിച്ചവരെ ഇതുവരെ തിരിച്ചറിഞ്ഞിട്ടില്ല. പരുക്കേറ്റവരെ ജിടിബി ആശുപത്രിയിലേക്ക് മാറ്റി.

ആശുപത്രിയിൽ പ്രവേശിപ്പിച്ചവരെ തിരിച്ചറിഞ്ഞതായും ഡ്രൈവർക്കായി അന്വേഷണം നടക്കുകയാണന്നും പോലീസ് അറിയിച്ചു. മുഷ്താഖ് (35), കമലേഷ് (36) എന്നിവര്‍ക്കാണ് പരുക്കേറ്റത്. അപകടത്തിൽപ്പെട്ടവർ സ്വന്തമായി വീടില്ലാത്തവരാണ്. സ്ഥിരമായി ഫുട്പാത്തിൽ ഉറങ്ങുന്നവരുടെ മേൽ സീലംപൂരിൽ നിന്നും വന്ന ട്രക്ക് നിയന്ത്രണം വിട്ട് പാഞ്ഞുകയറുകയായിരുന്നു.