കെ.ബാബുവിന്റെ വിജയം അസാധുവാക്കണം; ഹൈക്കോടതി വിധിക്കെതിരെ സ്വരാജ് സുപ്രീം കോടതിയില്‍; തൃ​പ്പൂ​ണി​ത്തു​റ​ വിജയത്തെ ചൊല്ലിയുള്ള നിയമപോരാട്ടം ഇനി ഉന്നത നീതിപീഠത്തില്‍

ഡ​ൽ​ഹി: തൃ​പ്പൂ​ണി​ത്തു​റ​യി​ൽ കെ.ബാബുവിന്റെ തിരഞ്ഞെടുപ്പ് വിജയം ചോദ്യം ചെയ്ത ഹര്‍ജി തള്ളിയതിനെതിരെ എം. സ്വ​രാ​ജ് സു​പ്രീം കോ​ട​തി​യി​ൽ അ​പ്പീ​ൽ ന​ൽ​കി. ബാബു വിശ്വാസത്തെ കൂട്ടുപിടിച്ച് വോട്ടുതേടി എന്നാരോപിച്ചാണ് എൽഡിഎഫ് സ്ഥാനാർഥിയായിരുന്ന സ്വരാജ് ഹൈക്കോടതിയെ സമീപിച്ചത്. സ്വരാജിന്റെ ഹര്‍ജി തള്ളിയ ഹൈക്കോടതി ബാ​ബു​വി​ന്‍റെ വി​ജ​യം ശരിവയ്ക്കുകയാണ് ചെയ്തത്.

തനിക്കു വോട്ട് ചെയ്തില്ലെങ്കില്‍ അയ്യപ്പനു ദൈവകോപം ഉണ്ടാകുമെന്നു പറഞ്ഞ് കെ.ബാബു വോട്ടര്‍മാരെ ഭയപ്പെടുത്തിയെന്നാണ് സ്വരാജിന്റെ ഹര്‍ജിയില്‍ പറയുന്നത്. വോട്ട് അഭ്യര്‍ഥിച്ചുള്ള സ്ലിപ്പില്‍ ബാബുവിനൊപ്പം അയ്യപ്പന്റെ ചിത്രവും ഉപയോഗിച്ചെന്നും ഹർജിയിലുണ്ട്. ഈ ഹർജി ഹൈക്കോടതി തള്ളിയിരുന്നു.

ഹൈ​ക്കോ​ട​തി സിം​ഗി​ൾ ബെ​ഞ്ചാ​ണ് കഴിഞ്ഞ ​നി​യ​മ​സ​ഭാ തെ​ര​ഞ്ഞെ​ടു​പ്പു​മാ​യി ബ​ന്ധ​പ്പെ​ട്ടു​ള്ള കേ​സി​ൽ വി​ധി പ​റ​ഞ്ഞ​ത്. ബാബുവിന് വോട്ട് ചെയ്യണമെന്ന് ആവശ്യപ്പെട്ട് അയ്യപ്പന്‍റെ ചിത്രമുള്ള സ്ലിപ്പുകള്‍ യുഡിഎഫ് പ്രവര്‍ത്തകര്‍ വീടുകളില്‍ എത്തിച്ചതിനു തെളിവ് ഹാജരാക്കാന്‍ സ്വരാജിന് കഴിഞ്ഞിരുന്നില്ല. മ​ത​ചി​ഹ്നം ഉ​പ​യോ​ഗി​ച്ച് വോ​ട്ട് തേ​ടി എ​ന്ന ആ​രോ​പ​ണം സാ​ധൂ​ക​രി​ക്കു​ന്ന സാ​ക്ഷി​മൊ​ഴി​ക​ളി​ല്ലെ​ന്നും പ്രോ​സി​ക്യൂ​ഷ​ൻ സാ​ക്ഷി​മൊ​ഴി​ക​ൾ സം​ശ​യ​ത്തി​ന് അ​തീ​ത​മാ​യി തെ​ളി​യി​ക്കാ​ൻ ക​ഴി​ഞ്ഞി​ട്ടി​ല്ലെ​ന്നും ഹൈ​ക്കോ​ട​തി നി​രീ​ക്ഷി​ച്ചിരുന്നു.