വിജയ് ദേവരകൊണ്ടയ്‌ക്കൊപ്പം മമിത ബൈജു; തെലുങ്കില്‍ താരത്തിന് വന്‍ സ്വീകരണമെന്ന് റിപ്പോര്‍ട്ട്; പാന്‍ ഇന്ത്യന്‍ നായിക നിരയിലേക്ക്

പ്രേമലു എന്ന ഒറ്റ സിനിമ കൊണ്ട് മമിത ബൈജുവിന്റെ തലവര തന്നെ മാറി. തമിഴിലും തെലുങ്കിലും മമിതയ്ക്ക് ആരാധകര്‍ നിറഞ്ഞു. പ്രേമലുവിന്റെ തെലുങ്ക് പതിപ്പുകൂടി റിലീസ് ആയതോടെ മമിത താരമായി. തമിഴില്‍ ഇതോടകം രണ്ട് സിനിമകള്‍ ചെയ്തുകഴിഞ്ഞ മമിത തെലുങ്കില്‍ അരങ്ങേറ്റം കുറിക്കുന്നതായാണ് പുതിയ വാര്‍ത്ത. വിജയ് ദേവരകൊണ്ട നായകനാകുന്ന ചിത്രത്തില്‍ മമിതയാകും നായിക എന്നറിയുന്നു. വിജയ് ദേവരകൊണ്ടയുടെ പന്ത്രണ്ടാമത്തെ സിനിമയായിരിക്കും ഇത്. വിജയ് ദേവരകൊണ്ടയുടെ കടുത്ത ആരാധിക കൂടിയാണ് മമിത.

ജേഴ്‌സി എന്ന ചിത്രം സംവിധാനം ചെയ്ത ഗൗതം നിന്നനൂര്‍ ആയിരിക്കും ഈ ചിത്രത്തിന്റെ സംവിധായകന്‍ എന്നാണ് വിവരം. സിതാര എന്റര്‍ടെയ്ന്‍മെന്റ്‌സിന്റെ ബാനറില്‍ ആയിരിക്കും ചിത്രം ഒരുങ്ങുന്നത്. നേരത്തെ മറ്റൊരു നായികയെ പരിഗണിച്ചിരുന്നെങ്കിലും അവര്‍ പിന്മാറിയതോടെ മമിതയ്ക്ക് നറുക്കുവീണു എന്നാണ് റിപ്പോര്‍ട്ടുകള്‍. എന്നാല്‍ ഇതേക്കുറിച്ച് ഔദ്യോഗിക സ്ഥിരീകരണം പുറത്തുന്നിട്ടില്ല.