വയനാട് പുനരധിവാസത്തിനായി ഇന്ന് പ്രത്യേക മന്ത്രിസഭാ യോഗം; ടൗൺഷിപ്പ് കാര്യത്തില്‍ ഉടന്‍ തീരുമാനമുണ്ടാകും

വയനാട് ദുരന്തത്തിനിരയായവരുടെ പുനരധിവാസ പ്രശ്നം ചര്‍ച്ച ചെയ്യാന്‍ ഇന്ന് പ്രത്യേക മന്ത്രിസഭാ യോഗം ചേരും. ഉരുൾപൊട്ടൽ ദുരന്തബാധിതരുടെ പുനരധിവാസത്തിനായി തയ്യാറാക്കിയ പട്ടികയെ ചൊല്ലി വൻ വിവാദം തുടരുമ്പോഴാണ് യോഗം ചേരുന്നത്. ഈ പ്രശ്നം യോഗത്തില്‍ ചര്‍ച്ചയാകും. വീട് നിർമ്മാണത്തിന് സഹായം വാഗ്ദാനം ചെയ്തവരുടെ യോഗവും ഉടൻ ചേരും. ടൗൺഷിപ്പ് നിർമ്മാണത്തിന്റെ കാര്യത്തിലും തീരുമാനം വരും.

പുനരധിവാസ പ്രശ്നത്തിന്റെ തുടര്‍ചർച്ചകൾക്ക് ചീഫ് സെക്രട്ടറിയെ ചുമതലപ്പെടുത്തിയിട്ടുണ്ട്. വീട് നിർമ്മിക്കാൻ സർക്കാർ കണ്ടെത്തിയ നെടുമ്പാല എസ്റ്റേറ്റിന്റെയും എൽസ്റ്റോൺ എസ്റ്റേറ്റിൻറയും ഉടമകൾ ഹൈക്കോടതിയെ സമീപിച്ചിട്ടുണ്ട്. ഈ കാര്യവും മന്ത്രിസഭായോഗത്തിന്റെ പരിഗണനയിലുണ്ട്.

ദുരന്തബാധിതരുടെ പുനരധിവാസത്തിനായി തയ്യാറാക്കിയ പട്ടികയെ ചൊല്ലി വൻ വിവാദമാണ് വയനാട്ടില്‍ ഉള്ളത്. നാലര മാസം നീണ്ട കാത്തിരിപ്പിനൊടുവിലാണ് ഗുണഭോക്താക്കളുടെ പട്ടിക സർക്കാർ പുറത്തിറക്കിയത്. 88 കുടുംബങ്ങളുള്ള പട്ടിക കൃത്യമല്ലെന്നും പിൻവലിക്കണമെന്നും ആവശ്യപ്പെട്ട് ദുരന്തബാധിതരുടെ ആക്ഷൻ കൗൺസിൽ പ്രതിഷേധമുയർത്തിയിട്ടുണ്ട്. പിഴവുകൾ കണ്ടെത്തിയ സാഹചര്യത്തിൽ ഡിഡിഎംഎ യോഗം ചേരാൻ ജില്ലാ ഭരണകൂടം തീരുമാനിച്ചു.