സീരിയല്‍ ഷൂട്ടിംഗ് സംഘത്തിന് നേരെ ‘പടയപ്പ’യുടെ ആക്രമണം; കാറുകളും ബൈക്കുകളും തകര്‍ന്നു

മൂന്നാറില്‍ വീണ്ടും പടയപ്പയുടെ ആക്രമണം. സീരിയല്‍ ഷൂട്ടിംഗ് കഴിഞ്ഞ് മടങ്ങുകയായിരുന്ന വാഹനങ്ങള്‍ക്കിടയിലേക്ക് ആണ് പടയപ്പ പാഞ്ഞടുത്തത്. ആനയുടെ പരാക്രമത്തില്‍ രണ്ട് കാറുകളും ബൈക്കുകളും തകര്‍ന്നു.സെലന്റ് വാലി റോഡില്‍ കുറ്റിയാര്‍വാലിക്ക് സമീപം വച്ചായിരുന്നു സംഭവം.

സെലന്റ് വാലിയിൽ നടക്കുന്ന സീരിയല്‍ ഷൂട്ടിങ് കഴിഞ്ഞ് മടങ്ങുകയായിരുന്ന സംഘമാണ് പടയപ്പയുടെ മുന്നില്‍പ്പെട്ടത്. വാഹനത്തില്‍ ഉണ്ടായിരുന്നവര്‍ ഓടി രക്ഷപ്പെട്ടു. വിവരം അറിഞ്ഞ് വനംവകുപ്പ് ആര്‍ആര്‍റ്റി ഡെപ്യൂട്ടി റെയിഞ്ചറുടെ നേതൃത്വത്തിലുള്ള സംഘം സ്ഥലത്തെത്തി പടയപ്പയെ കാട്ടിലേക്ക് ഓടിച്ചു.

പടയപ്പ ഇപ്പോള്‍ ഇടയ്ക്കിടെ നാശം വിതയ്ക്കുന്നുണ്ട്. മൂന്നാറില്‍ ഉള്ളവര്‍ ഇതില്‍ ആശങ്കാകുലരാണ്. കഴിഞ്ഞ ദിവസം മൂന്നാറിലെ ജനവാസമേഖലയില്‍ എത്തി വ്യാപകമായി കൃഷി നശിപ്പിച്ചിരുന്നു. ആളുകൾ ബഹളം വച്ചതോടെയാണ് മടങ്ങിയത്.