മകനെ വെട്ടിനുറുക്കി അമ്മ!! കാരണം ദുർനടപ്പ്; തൻ്റെ ബന്ധു സ്ത്രീകളെ പോലും വെറുതെ വിട്ടില്ലെന്ന് പെറ്റമ്മയുടെ പരാതി

ആന്ധ്രപ്രദേശിലെ പ്രകാശം ജില്ലയിൽ നിന്നുള്ള കെ ലക്ഷ്മിദേവി എന്ന 57കാരിയാണ് 37കാരനായ തൻ്റെ മകൻ ശ്യാമ പ്രസാദിനെ വകവരുത്തിയത്. മകൻ്റെ വഴിവിട്ട ഇടപാടുകളിൽ മനംമടുത്തിട്ട് ആണെന്നും മറ്റ് വഴിയില്ലായിരുന്നു എന്നുമുള്ള അമ്മയുടെ നിസഹായ സാഹചര്യം പോലീസ് മനസിലാക്കിയിട്ടുണ്ട്. എന്നാൽ പ്രതികൾക്കായുള്ള തിരച്ചിൽ നടക്കുകയാണെന്ന് പ്രകാശം ജില്ലാ എസ്പി എ ആർ ദാമോദർ മാധ്യമങ്ങളോട് പറഞ്ഞു.

ഹൈദരാബാദിലുള്ള അടുത്ത ബന്ധുക്കളായ സ്ത്രീകളെ പോലും ഈയടുത്ത കാലത്ത് ശ്യാമപ്രസാദ് ഉപദ്രവിച്ചതായി പോലീസിന് വിവരം ലഭിച്ചിട്ടുണ്ട്. ഇവർ ശ്യാമപ്രസാദിൻ്റെ അമ്മയുടെ ഏറ്റവുമടുത്ത ബന്ധുക്കളും ആയിരുന്നു. ഈ സംഭവം അമ്മ ലക്ഷ്മി ദേവിയെ ആകെ ഉലച്ചുകളഞ്ഞതായി അടുത്ത ബന്ധുക്കൾ പോലീസിനെ അറിയിച്ചിട്ടുണ്ട്. അവിവാഹിതനായിരുന്ന ശ്യാമപ്രസാദിനെ ഒരുവിധത്തിലും നിയന്ത്രിക്കാൻ അമ്മക്ക് കഴിഞ്ഞിരുന്നില്ല.

മഴു അല്ലെങ്കിൽ അതുപോലെ മൂർച്ചയുള്ള ആയുധം കൊണ്ടാണ് കൊല നടത്തിയതെന്ന് കണ്ടെത്തിയിട്ടുണ്ട്. ശരീരം അഞ്ചു കഷണങ്ങളാക്കി മുറിച്ച് ജലസേചന കനാലിൽ ഒഴുക്കുകയായിരുന്നു. ഇക്കാര്യങ്ങളിൽ ലക്ഷ്മി ദേവിക്ക് ബന്ധുക്കളിൽ ചിലരുടെ സഹായം കിട്ടിയതായി വ്യക്തമായിട്ടുണ്ട്. ഇവരടക്കം പ്രതികൾക്കായുള്ള തിരച്ചിലിലാണ് പോലീസ്.