വിഴിഞ്ഞം തുറമുഖ ഡയറക്ടര്‍ മുഖ്യാതിഥി; ഐഎസ്ആർഒ യൂണിറ്റുകൾ സംഘടിപ്പിച്ച ലോക ബഹിരാകാശ വാരാഘോഷം സമാപിച്ചു

തിരുവനന്തപുരം: ഐഎസ്ആർഒ യൂണിറ്റുകൾ തുമ്പ വലിയമലയില്‍ സംയുക്തമായി സംഘടിപ്പിച്ച ലോക ബഹിരാകാശ വാരാഘോഷം (ഡബ്ല്യുഎസ്ഡബ്ല്യു) ഇന്ന് സമാപിച്ചു.  പേൾ ജൂബിലി ഓഡിറ്റോറിയത്തിൽ വെച്ചു നടന്ന (എൽപിഎസ്സി) സമാപന ചടങ്ങിൽ ഡോ. ജയകുമാർ (CEO & ഡയറക്ടർ, വിഴിഞ്ഞം ഇൻ്റർനാഷണൽ സീപോർട്ട് ലിമിറ്റഡ്) മുഖ്യാതിഥിയായി. ചന്ദ്രയാൻ -3 വിജയ ദൗത്യത്തിന് പിന്നിൽ പ്രവർത്തിച്ചവരെയെല്ലാം അദ്ദേഹം അഭിനന്ദിച്ചു. ബഹിരാകാശവും സംരംഭകത്വവും ഈ വർഷത്തെ ലോക ബഹിരാകാശ വാരാഘോഷ പ്രമേയം എന്നാണ്. കൂടാതെ ഈ മാസം 15 -ന് പ്രവർത്തനം ആരംഭിക്കുന്ന വിഴിഞ്ഞം സീ പോർട്ടിന്റെ ഡെമോ വീഡിയോയും പ്രദർശിപ്പിച്ചു.

വാരാചരണത്തിന്റെ ഭാഗമായി സ്കൂൾ, കോളേജ് വിദ്യാർത്ഥികൾക്കും പൊതുജനങ്ങൾക്കുമായി വിവിധ പരിപാടികൾ നടന്നു. ഇതിന്റെ ഭാഗമായി തുമ്പയിൽ നിന്ന് പ്രത്യേക സൗണ്ടിംഗ് റോക്കറ്റ് വിക്ഷേപണവും സംഘടിപ്പിച്ചിരുന്നു.  ബഹിരാകാശ ശാസ്ത്രജ്ഞർ സംസ്ഥാനത്തെ 300-ഓളം സ്‌കൂളുകളിൽ ക്ലാസുകൾ നടത്തി. വിഎസ്എസ്സി, ലിക്വിഡ് പ്രൊപ്പൽഷൻ സിസ്റ്റംസ് സെന്റർ, ഐഎസ്ആർഒ ഇനേർഷ്യൽ സിസ്റ്റംസ് യൂണിറ്റ് എന്നിവ സംയുക്തമായി സംഘടിപ്പിച്ച ഡബ്ല്യുഎസ്ഡബ്ല്യു ആഘോഷങ്ങൾ ഒക്ടോബർ നാലിനാണ് ആരംഭിച്ചത്.