വ്യാപാരിയെ കഴുത്തറത്ത് കൊന്നത് ഭിന്നശേഷിക്കാരനോ; സിസിടിവി ദൃശ്യങ്ങള്‍ ഉയര്‍ത്തുന്നത് പലവിധ സംശയങ്ങള്‍

മലയിന്‍കീഴ് സ്വദേശി ദീപു(46)വിനെ കളിയിക്കാവിളയില്‍ കഴുത്തറത്ത് കൊന്നത് ഭിന്നശേഷിക്കാരനോ? റോഡിനരികില്‍ പാര്‍ക്ക് ചെയ്ത കാറിനുള്ളില്‍ കഴുത്തറുത്ത നിലയിലാണ് ദീപുവിന്റെ മൃതദേഹം കണ്ടെത്തിയത്. സിസിടിവി ദൃശ്യങ്ങളില്‍ ഒരാള്‍ കാറില്‍ നിന്നും ഇറങ്ങിപ്പോകുന്ന ദൃശ്യമുണ്ട്. ഒരു ഭിന്നശേഷിക്കാരനാണ് ഇതെന്ന സംശയമാണ് പോലീസിനുള്ളത്. കാറിലുണ്ടായിരുന്ന പത്തു ലക്ഷം രൂപ മോഷണം പോയിട്ടുണ്ട്. സംശയമുള്ളവരെ പോലീസ് കസ്റ്റഡിയില്‍ എടുത്തിട്ടുണ്ട്. ഇവരെ ചോദ്യം ചെയ്തുവരികയാണ്.

ദീപുവിന്റെ കയ്യിൽ പണമുണ്ടെന്ന് ആര്‍ക്കോ അറിയാം. അവരാണ് കൊലയ്ക്ക് പിന്നില്‍ എന്ന നിഗമനത്തിലാണ് പോലീസ്. നെയ്യാറ്റിന്‍കരയില്‍നിന്നും തക്കലയില്‍നിന്നും ഒരാള്‍ വീതം ഒപ്പമുണ്ടാകുമെന്നാണ് ദീപു വീട്ടില്‍ പറഞ്ഞിരുന്നത്. അവസാനമായി വിളിച്ച മാര്‍ത്താണ്ഡം ഭാഗത്തുള്ള ചിലരെ കേന്ദ്രീകരിച്ചും അന്വേഷണം നടക്കുന്നുണ്ട്. കുറ്റവാളിയെ ഉടന്‍ പിടികൂടുമെന്നാണ് പോലീസ് പറയുന്നത്. നെയ്യാറ്റിന്‍കര മുതല്‍ കളിയിക്കാവിള വരെയുള്ള സിസിടിവി ദൃശ്യങ്ങള്‍ പൊലീസ് പരിശോധിക്കുന്നുണ്ട്. പണത്തിനായി ചിലര്‍ ഭീഷണിപ്പെടുത്തിയിരുന്നു എന്ന് ദീപുവിന്റെ ഭാര്യ വിധുമോള്‍ ആരോപിച്ചിട്ടുണ്ട്. ഇതെല്ലാം പോലീസ് പരിശോധിക്കുന്നുണ്ട്.

അതേസമയം ദീപുവിന്റെ കൊലപാതകത്തിന്റെ ഞെട്ടലിലാണ് ബന്ധുക്കളും സുഹൃത്തുക്കളും. രാത്രി ഏഴരയോടെയാണ് ദീപു വീട്ടില്‍ നിന്നും ഇറങ്ങിയത്. കളിയിക്കാവിള പൊലീസ് സ്‌റ്റേഷനില്‍നിന്ന് 200 മീറ്റര്‍ മാറി കാര്‍ പാര്‍ക്ക് ചെയ്ത നിലയിലാണ് മൃതദേഹം കണ്ടെത്തിയത്. ബോണറ്റ് പൊക്കിവച്ച്, ലൈറ്റ് ഓണ്‍ ചെയ്ത വാഹനം കണ്ടാണ് പൊലീസിന്റെ പട്രോളിങ് സംഘം പരിശോധന നടത്തിയത്. അപ്പോഴാണ് കൊലപാതക വിവരം വെളിയില്‍ വന്നത്.